Wewe嘩嘩！大尾篤掘蜆之旅

週末當然要搵下同學仔去”反”下， 但是無眾男兵同行，只有我們這班娘子軍帶住幾隻馬騮仔，可以去邊？當然要搵個近近地的地方，家住大埔，最近就去大尾篤掘下蜆la！

早一晚兩隻馬騮仔已經好興奮，執定所有用具等去玩哈哈！當日約了同學仔11點在大埔墟火車站等，之後就坐小巴，十多分鐘就到。一班同學仔一上到車就雞啄唔斷，我相信個司機是好想趕班細路落車~~ haha~~~ 到達後，先醫下個肚仔先~ 

可能人多夠開心，班細路突然間飯量增多，連食幾碗………食飽飽後，原以為潮水未退，因為當日看潮退是3點半，本想在附近行下才去掘蜆，怎知兩點左右已見到有人掘緊蜆，班細路當然即時走去玩la！

除了掘蜆，小朋友還找來蟹仔、魚仔及貝殼，好開心啊！


玩到四點左右, 個個都變曬濕水鴨仔，要走啦，但班細路玩到唔肯走，我們一邊執拾，班細路就一邊繼續發掘他們的寶貝，我囡囡還拾來好多石頭……我就要偷偷咁放低哈哈！小朋友當然玩得開心la，最重要還是有收獲，好滿足！離開前我們在燒烤場那邊清洗一下， 歎下支雪條~ ~正！♥Angel媽媽

1. 可以留意天文台公佈的潮退情況 http://www.hko.gov.hk/tide/cstation_select.htm
2. 在附近燒烤場的檔仔有掘蜆工具賣，釣魚用品、雪糕,、冷菠蘿等都有。
3. 燒烤場附近有公廁，都幾”企理”。
4. 最好著短褲及水鞋/洞洞鞋。
5. 要留意是石灘，提醒小朋友用工具去掘，盡量不要用手及赤腳，否則容易被刮損。

#  在大埔墟火車站外新達廣場附近的巴士總站，可乘坐九巴75K 或 275R號線(假日)在大尾篤總站(水上活動中心旁 )下車，車程約30分鐘。
# 20C專線小巴(約15分鐘)，同樣在大尾篤總站下車。