好玩輕鐵遊 ‧ 迷你「挪亞方舟」+石灘尋蜆

今次剩係坐住架輕鐵，就帶住我哋一家去咗好多個地方， 先到老鼠洲兒童遊樂場， 然後屯門碼頭， 再行過蝴蠂灣泳灘， 最後到湖山單車公園同屯門交通安全城， 好充實！

我哋先在水邊圍輕鐵站起步， Hysan同芊芊輪流踩住scooter行去輕鐵站， 乘搭614往屯門碼頭方向， 其實連坐輕鐵小朋友都當係景點之一， 搭咗差唔多15-20分鐘到就到咗兆麟站啦在兆麟站落車之後， 沿行人天橋行過對面， 向前行2分鐘就見到老鼠洲兒童遊樂場!

公園唔算大， 但係最特別係架船造型既遊玩設施! 企喺船頭影相既時侯其實都幾似係去咗挪亞方舟架!

裡面設施以外的地方都幾好走， 唔會話太驚小朋友撞到， 呢度既設施都比一般公園較為特別， 剩係講爬嚟爬去既設施都好唔同!裡面有兩個大木桶造型既地方(好似叮噹既大水管咁)， 用嚟玩”躲貓貓”(捉衣因)都幾正! 呀妹周圍行玩暈咁多樣嘢!哥哥行咗去船邊落唔番嚟….

我哋玩完之後跟住都差唔多兩點， 哥哥突然話好肚痛， 突然之間我都唔知去邊度搵厠所咁啱聽到人講話呢度有大快活， 所以我哋就一齊入去屋苑內的大快活， 順便食下午茶! 俾小朋友去吓厠所嘆吓冷氣!

跟住我哋就行番出去兆麟站搭614， 本來打算先去湖山公園然後去屯門碼頭睇日落， 但係侄仔係飛機迷， 想即刻去睇飛機降落， 所以我改咗先去屯門碼頭，我哋沿住碼頭一路行，去到蝴蝶灣公園，見到有個石灘， 好多人喺度掘蜆， 我哋就走埋去睇! 不過始終都唔夠貝澳個D專掘蜆的地方， 有D污糟， 所以我哋望吓就走!

跟住前面有個用好多大石頭堆砌的路， 我同Hysan就試吓行過去， 咁又可以當係一個遊玩景點喇! 行起上嚟都幾遠架， 不過佢慢慢行都行到過去! 如果落雨天就唔好啦， 會容易跣親!

呀劍評分: 8分
呀劍評語: 每一個地點唔算係D咩好特別既地方， 但係用輕鐵將每一個地方串連埋一齊! 就覺得好完整好特別! 除咗在每個地方玩之外， 坐輕鐵都變咗係其中一個玩點!

♠♠♠♠♠♠♠♠♠♠♠♠♠♠♠♠♠♠♠♠♠♠♠♠♠♠♠♠♠♠♠♠♠♠♠♠♠♠♠♠
地址：
老鼠洲兒童遊樂場
屯門鄉事會路與海榮路交界 輕鐵兆麟站或三聖站步行若5分鐘
屯門碼頭
蝴蝶灣東面、海翠花園對出
湖山遊樂場/單車公園
屯門湖山路
輕鐵兆禧站步行若10分鐘
2463 7597