行山+農莊+展館+趁墟「獅子會」親子遊

我哋一家今次去親親大自然 — 獅子會自然教育中心。我哋搭港鐵去到彩虹C2出口轉1A專線小巴大約15分鐘就到。其實大家可以於北港巴士站落， 但係我哋揀咗喺車路入口，步行5分鐘到達停車場。

我哋先在停車場附近的山頭散步！更亭姨姨話我哋知，行上山丘會見到幾隻牛牛，那當然要去會一會牛牛先！行上去唔駛幾耐就見到啦！大家可以放心，因為佢哋都係有人養既，唔係野生！所以見到我哋行到咁近都冇咩反應， 我諗佢哋都慣！

佢哋真係好自由自在，我哋一路跟住佢哋！行到入個大草地！ 呢度放咗好幾張枱櫈，如果近近哋入嚟野餐都幾好！入到嚟梗係要做D Wild嘢爬吓樹啦！妹妹爬唔到樹就玩樹枝，佢仲執到支好長既樹枝tim！

難得可以咁近對住D牛牛畫畫，哥哥畫完之後仲行番落去送俾更亭姨姨，然後我哋去個廁所，就繼續行上停車場對面既山頭。原來上面是個大平地， 有2，3個公公婆婆喺度晨運！哥哥見到有少少沙地， 就提議執樹枝喺地上面寫字！好感動哥哥寫咗「我愛你爸爸」送俾我！

穿過呢個隧道就見到「獅子會教育中心」同其他展館，都未行到幾步又一個大平地，小朋友好自然又跑跑跳跳haha~~呢度仲有張靚靚石櫈， 要喺度影番幾張相留念吓先！

嘩，見到一大塊農田！不過係迷你版，你會見到細細塊田上咩植物蔬菜都有D，我同芊芊落咗嚟農田， 見到菠蘿，火龍果同里木瓜！！後面呢D黃色花都好靚呀！好似係菜心嚟架… 我同芊芊繼續行去其他農田， 見到小荷花池、同薰衣草！！

呢度仲有好多其他得意既植物同中草藥！更有逢星期六、日先會開檔的農墟！繼續行上去係蕉坑自然教育徑，重有茶座，可以同小朋友行吓山High吓Tea！然後我哋就去咗隔離個昆蟲館望吓啦！放喺門口呢隻大甲蟲都好靚！

館內唔算大同埋比較資料性和以標本為主！相比起大埔海濱公園及屯門昆蟲館冇咁多真實昆蟲睇！呢度D遊戲幾好玩，大人都可以玩埋一份(眼明手快搵番隻昆蟲出嚟)，呢度有個視訊位置播住蝴蝶整個演變過程！

離開昆蟲館我哋就去到漁館， 地質公園學習園地同貝殼館！


行咗咁多館好充實！之後我哋由北港巴士站出口離開，跟住搭92號巴士到西貢巿中心！然後去到碼頭坐低望吓人釣魚，仲見到好多艇仔泊喺碼頭邊賣嘢！有位叔叔同鸚鵡仲好識擺Pose俾我影咗張相haha~~我哋繼續喺巿中心周圍行吓， 順便搵吓有咩食！正！

♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥
呀劍評分: 10分
呀劍評語: 呢度地方好大, 平日來亦少人, 感覺好舒服, 可以感受遠足行山嘅氣氛, 亦有工作坊及露天茶座, 真係一次過滿足哂大人小朋友！

獅子會自然教育中心 
位 於 西 貢 蕉 坑 特 別 地 區 的 漁 農 自 然 護 理 署 獅 子 會 自 然 教 育 中 心 佔 地 約 16 公 頃 ， 設 有 五 個 展 覽 館 和 多 個 戶 外 特 色 展 區, 為 學 校 、 機 構 及 公 眾 提 供 各 類 自 然 教 育 、 野 外 研 習 和 自 然 導 賞 的 活 動 ， 是 一 個 老 少 咸 宜 的 郊 遊 好 地 方 。
地址：香港新界西貢半島對面海蕉坑
電話：2792 2234
網址：(按此)

開放時間：
星期一、星期三至星期日及公眾假期：上午九時三十分至至下午五時開放/ 展覽館開放至下午四時三十分。
星期二(公眾假期除外)及農曆新年年初一及初二休館
停車場：上午九時三十分至下午四時三十分

交通：
於北港巴士站下車，然後步行前往中心
92號巴士來往港鐵鑽石山站－西貢
1A號專線小巴來往港鐵彩虹站－西貢