爸爸媽媽，你是孩子的‥‥‥什麼?

長輩們常說﹕「湊大一個細路，真係唔簡單，用左 “幾担”心機呀！」
用心養兒育女的父母，對這句話必定有共鳴！過程中，父母身兼多種角色，最基本當然是經濟上供給，叫孩子吃得飽穿得暖。還有呢?

  監管  
「明天默書，你溫咗未？」
「吓？去咗補習社三粒鐘，仲有咁多功課未做？！！」
「睇吓而家幾點鐘！！仲唔開始做功課，係咪要我發嬲你先安落呀！！！」
「點解數學測驗錯咁多？！呢啲你明明識架，咁唔小心！失晒啲無謂分數，好唔抵呀！！」
「今日只係練左十五分鐘琴咋喎，去到琴老師度又唔識彈，知唔知你既學琴費有幾貴呀！！」
**耳熟能詳的指令，充斥著許多有孩家庭，似是香港家長與子女相處方程式**

  接送  
「阿囡，快啲換衫執背囊啦，三分鐘內唔出門口，你既英語拼音班就遲到啦！」
「食快啲啦，求先跳舞遲左落堂，由呢度搭車去奧數班要三十分鐘架！」
「阿仔，記得合唱團一完就第一個出黎，我係門口等你，買定個包你食，我地要趕去游水班，知嗎？」
**趕趕忙忙，接二連三，刻不容縱。如此這般，似是香港家長與子女度周未的方程式**

  玩伴  
「囝囝，我來陪你砌lego呀，好嗎？」
「哈哈！ 不如你做老師，我做學生，你教我寫字呀！」
「嘩！你支水槍好勁喎！等我都入滿水先！睇住，我出招啦！」
「唔……風吹來我面上，好舒服！囡囡，我地踩單車去到前面空地就休息一陣啦！」
**輕鬆自在，溫馨寫意。好令人羡慕的親子方程式**

  談心  
「我覺得呢間新開茶餐廳無乜特別，都係平時食慣果間好啲，你話呢？」
「下星期你去同學生日會，好開心喎！要唔要我幫你預備禮物？」
「今次測驗成績跌左，似乎你自己都好挫敗！唔……我地一齊慘一陣，然後再想想辦法啦！」
**閒聊與談心，建立父母子女間深厚感情的不二法門。**

今時今日的孩子，要活在強大的競爭和壓力中，父母也疲於奔命！交功課、溫習、考試、各式各樣課外活動，似乎永遠都是 “Urgent” (緊急)的。但只聚焦於這些 “Urgent”項目，會令人忘掉和失卻了 “Important” (重要)事項，也就是跟孩子玩耍、閒聊或傾心事。

每人每天都只有廿四小時，為人父母者，放多少時間於自己的工作、多少時間監管孩子、接送、陪伴他/她玩耍聊天，實難選擇。香港的大環境生活急促迫人，父母能否(及會否)採取主導，付出時間心思，去建立你與子女間的情感連繫；抑或只作他們的監督呢? 這就要看父母的能耐了。若有前者(感情連繫及基礎)，則後者(監管)會來得較輕省啊！