澄澄嵐嵐之深涌玩樂遊

今朝澄澄一起身就好興奮咁問我：「係咪去行山山？」原來上次我同爸爸同澄澄嵐嵐一齊去行山已經係兩年前喇，個陣澄澄仲要坐BB車，但宜家已經可以自己一個人行喇！難得假期，我地一齊由西貢榕樹澳行去西貢深涌！

沿途有唔少細河流，澄澄每次經過都會蹲低睇下有冇魚，專心到唔肯走。本來我同爸爸都想同佢落去睇下，降下溫之餘，又可以比澄澄試下落水。可惜水漲，始終有少少危險，於是只係同澄澄喺河邊睇。

過一陣之後，澄澄突然好興奮咁大叫：「Butterfly Butterfly！」之後仲嘗試伸隻手仔去摸！但澄澄仲細，又點會咁易摸到…:P之後仲見到蜜蜂、蜻蜓，呢d小動物對佢地黎講都好新鮮，澄澄成日去追佢地，同佢地玩「捉衣因」！

後來，澄澄見到好大隻ge螞蟻搬緊野食，又停低睇左一陣！起初我以為澄澄會驚呢d平時好少接觸ge小動物，但原來佢好有興趣！跟住仲用手指指住路邊ge菇叫「粒粒呀粒粒呀」，哈哈，因為平時整蘑菇比佢食都會切到細細粒，所以佢叫d菇做粒粒…哈哈哈

行左一半路程之後，我見嵐嵐開始坐唔定，又成日眼仔碌碌咁望住家姐玩，所以就決定比佢落地一齊慢慢行！佢一落地，就指住d花係咁叫「花花。花花」。可能平時都比較少留意到路邊有花，當今次嵐嵐見到Playgroup教過ge花之後，表現得好興奮！

行多一陣之後就到左碼頭嚕！一見到海，澄澄就主動拖住嵐嵐，仲叫嵐嵐唔好行過海那邊，如果唔係會跌落去！嗰一刻，我發覺…原來澄澄不知不覺間真係大個左好多…！來到碼頭，一路看船，一路野餐，佢地兩個忙住望海，又忙住睇下有無船，仲要忙住食野！哈哈諗番個情景都覺得好搞笑！

由碼頭行去深涌大草地都只係15分鐘左右，旁邊有小石灘同溪流。一望到個大草地，澄澄好興奮咁小跳步跳去草地，我地仲同澄澄嵐嵐一齊試下除鞋，用雙腳親親大自然，佢地都冇抗拒，仲好主動咁蹲低睇蟹仔！後來問過士多老闆先知，原來呢度本來打算起高球渡假中心，但計劃最終都冇落成。)

後記：當晚一番到屋企，佢地沖完涼就好快主動話要瞓覺嚕！臨瞓前仲問我，幾時再去行山~睇黎，佢地今日真係玩到好攰好開心呢！^^

♥澄澄&嵐嵐 媽咪

 ♥ Parents Bonus：
我手畫我心
藉著這個活動，可增強家長與小朋友間的互動。透過繪製作品，讓家長與小朋友分享當天的得著和感受。
物資：報紙，雜誌，白紙，漿糊，剪刀，顏色筆，路途上所撿到的 乾花枯葉
玩法：
1. 利用報紙和雜誌的照片或圖畫，在白紙上繪製當天的所見所聞／眼前的景象。
2. 除了剪貼報上的圖片，也可以利用路途上所撿到的乾花枯葉作為繪製物品
3. 最後，可用顏色筆繪畫
注意：小朋友需要在家長陪同下使用剪刀

♠以上好玩遊戲由「THE CEPT」提供http://thecept.com/

 一家備忘：
1. 全程大約3個鐘
2. 沿途有三間士多，內有洗手間 (只係開星期五六日或者假日)。分別是榕樹澳士多（位於起點）、來記士多（行左四份一後）及深涌士多（位於終點）
3. 全程以平路為主，路亦夠闊，推住BB車都冇問題！
4.深涌有個大草地，可以野餐／放風箏；仲有條小河流，幾清，可以見到唔少蟹仔
5.記得帶備蚊怕水、帽/遮、水；沿途有狗，可帶定行山仗，以備不時之需；途中會有單車經過，但車速不快，不需太擔心

 交通： 
# 綠taxi ：「西貢市中心 至 榕樹澳」，費用：約＄60
# 巴士：299X來往西貢＜－＞沙田（水浪窩 下車）
  99來往烏溪沙鐵路站 ＜－＞西貢（水浪窩 下車）
# 小巴：807B來往 大學鐵路站／烏溪沙鐵路站＜－＞麥邊 （水浪窩 下車）
# 船：是指大學站的馬料水至深涌碼頭的船期；要留意船期班次好疏，特別係平日。