兩仔爺‧開心博物館之旅

今天難得爸爸話要同兩個細路出去行下，但就唔想曬又唔要多人……真難Wor~~上網找找資料，看來沙田香港文化博物館中的「兒童認知館」也不錯，應該可以去玩下，好！就決定去！問過朋友，可以坐馬鐵在車公廟站落車；而表姐就話在沙田火車站的話，只要經過希爾頓稻香那邊，有條電梯落地下，之後行過隧道就到。

去到沙田一點左右，便到希爾頓中心找間茶餐廳醫下肚先，食到兩點左右就起行啦！都幾易行到去，不過就要留心看清楚隧道內的指示牌，否則好容易行錯第二個出口。

去到當然買門票先，大人$10、小朋友$5，場館內的職員姨姨很好，教阿仔在票上先蓋上印留個紀念。然後當然主力去一樓的「兒童館認知館」先！入到門口已望見好多遊戲在前，兩個細路已經急不及待周圍走哈哈！今次場館的主題是有關海洋、動物、香港文化等，都幾有趣，唔知主題會否經常轉呢？

最估唔到是館內可以玩”捉棋”，我想這個角落會是父母favour呵呵~ 因為是兒時回憶嘛~~還有好多好多年前的棋及遊戲。另一邊廂妹妹就去了扮蟹、扮龍蝦哈哈~~現場還備有村民服及圍裙，俾小朋友借來玩cos-play扮嘢一番，好搞笑。妹妹急不及待扮哂”妹仔”、幫忙”煮下飯”、”打掃下”、”洗下衫”……不知不覺已玩上成個鐘，我覺可以去下其他展館才再返來玩，所以就捉住兩個細路走~~:)

徐展堂館有唔少中國文化的文物，都吸引到阿仔注目喎，加上有類似遊戲機設施形式去介紹展品，都幾得意，小朋友唔覺悶。今日還有李小龍展覽看，估唔到阿仔對這些展館都好有興趣，看完李小龍展覽，兩仔爺還要看介紹李小龍一生的電影(片長約75分鐘)，最後因為約了朋友食飯在先，看到6點左右就離開啦！

說真，這個博物館好值得再去，只是一個「兒童認知館」都夠玩兩、三個鐘。下次再去的話會看看可轉了新主題？不時有新鮮感當然好玩好多啦！

♥Angel媽咪