秋高氣爽！去農場包餃子‧整茶果‧ 學拔草

難得秋涼處處，約埋一班朋友仔去下農場玩，俾小朋友過下田園生活，好正！之前已跟農莊負責人溝通過，包午餐之餘亦會安排一D好玩又有意思嘅農家活動，小朋友一定盡興呀！當日我地一行廿幾人，所以分批入去，攪到阿老閭娘以為我是老師攪活動haha~~~有些同學仔坐的士；有些自己揸車；有些就在上水坐17號小巴，大約30分鐘就到。

去到農莊，等齊人約10點就開始！老閭娘就即時請我地食豆腐花、飲豆漿，好開心呀！滿滿足足咁，我地首先就去參觀下個農場. 農夫一路帶住我地遊農場， 一路介紹各種犆物俾我地知，呢個時候，成班小朋友已經雙眼發哂光，好想快D”落場”一顯身手做小農夫啦！

參觀完農莊一圈，農夫已經準備好材料教我地包餃子，班小朋友都未聽得及點樣包，已經個個爭住包，結果, 好多奇形怪狀的水餃出現LO~ 跟住我地就順便食埋個午飯。講起呢個農家菜午飲，只可以用新鮮+豐富來形容，各類瓜菜都好清甜爽口，蒸魚當然不少得，仲有好味靚湯及燸米飯、糖水源源不絕供應……加上小朋友自己之前包的餃子, 個個都食得好開胃！

食飽飽後，小朋友又精力充沛！農夫就帶小朋友去山頭拔野草，個個小朋友手戴手套，拿住個籃就衝上山啦！我可以好肯定，對小朋友來講呢個一定是最好玩遊戲haha!!!難為有位怪獸爸爸見到個女爬上小山坡，一時驚佢跌到，一時又驚佢俾蚊蚊咬，又驚佢”介”到手，佢個樣仲驚過個班小朋友haha~~~

拔完草，嘻嘻做什麼呢? 農夫又帶住一個二個滿戴”草”而歸的小朋友去另一個地方，登登……餵山羊HOHO！啊！不用去台灣都有羊羊餵呀！估唔到到妹妹竟然唔驚羊羊。啊~~~原來之前拔的野草是用來餵山羊！妹妹此時就怨怪獸爸爸之前唔俾佢多拔草，搞到唔夠餵~~~大家餵到無嘢好餵，才不捨地離開那個羊場。

跟住農夫見有時間，又教我地整茶果！又有得整整貼貼，班小朋友當然開心. 今次有些水準，因為大多是一個圓形，變化是可將一粒粒紅豆在茶果表面砌圖形，砌笑哈哈、砌車仔、蛇仔都得……隨小朋友創意呀，之後仲可以同茶果影番幅相留念，再食落肚，好滿足呀！

整完茶果我地還有時間，可以做什麼la ~就去摘士多啤梨啦！呢個時候竟然都有得摘，雖然士多啤梨就細D，不過都算幾甜！我地都玩到差不多4點，玩咗成日每位都不過百幾蚊 > < 是時候要走了，我地一班朋友仔行出大馬路，坐返小巴或的士各自滿滿足足咁返屋企啦！

♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥Angel媽媽

親子玩樂TIPS：
1.可以先致電或Whatsapp跟農場負責人溝通有什麼想做及有什麼活動安排，決定了後就先入訂金，到場時才交付尾數。
2.走入大自然，大人小朋友當然都要做定防曬及防蚊準備。
3.去到農莊，父母就要有心理準備俾小朋友多作嘗試，去摸、去爬、去體驗…唔好學如” 怪獸爸爸”太過阻止妹妹拔草，否則妹妹可以有更多” 彈藥”去餵羊。
4.農場內會有機蔬果售賣。

富琴有機火龍果生態農莊
地址： 上水古洞鐵杭村
電話： 65909268/26684822
FB：www.facebook.com/xmonkeydragonfruit
網頁： www.hkpitaya.com/
開放時間： 星期一至日(09：00-17：00)
泊車設施： 私家車/小型巴士/旅遊巴士